Skip to main content

الثلاثاء

استغفرالله اليوم دا كريه بشكل ، هو بس لما يعدي تتصلح الأمور كلها و يمشي الأسبوع 


المهم اليوم كلمت شركة التأمين و يقولوا لسه السياره في مرحلة التقييم .


اكتشفت في اليومين اللي ركبت فيها مع السواق أنه سواقة السواقين استغفرالله بس ، أنا مازالتعند رأيي نص حوادث البلد بسبب السواقين و سواقتهم .


وحشتني سيارتي و استقلالي و على الأقل امشي وقت ما امشي ما استنى أحد .


يعني قبل يومين كان عندي مشوار و أخدت السواق مع أنه كانت سيارتي موجوده ، بس أخدت السواق لأنه مافي مواقف ، و أنا نازله قلتله وقف السياره و استنى ،يقوم الذكي يرجع البيت ، خلصت مشواري دقيت عليه يقولي أنا في الغرفه ، يا ذكي يا فطحل أنا ليش ماخدتك ، و بعدين أنا كيف أرجع برجلي مثلا ، كويس الشوارع كانت فاضيه و جاني في ربع ساعه ، بس برضه كان احساس عفوا زباله ، أني قاعده استنى أحد يجي ياخدني .

اليوم و أنا في الاشاره شفت بنت راكبه سياره و شكلها واضح جديده بورقتها ، أمس شفت نفس البنت في نفس الاشاره ، افتكرت نفسي أنا وسيارتي ( وحشتني سيارتي) ، ولما جيت ادخل مجمع الدوام شفتها داخله معايا ، حسيتها أنا


حأقعد كدا حكاوي الطريق لغاية ما سيارتي ترجعلي 

Comments

Post a Comment

Popular posts from this blog

اليوم الاثنين

اليوم الاثنين ، أمس ما كتبت بوست لأني ببساطة ما جيت الدوام و لا سقت ، ليش يا ترى ، كان عندي مية شغلة و كان لازم اخد اضطراري و بالصدفه جات شركة التأمين اخدت السياره عشان تصلحها. الخبطة اللي خبطتها خفيفة ، اللمبة انكسرت شويه و البوية اتقشرت شويه و الصدام شويه انعفط ، فانشاء الله تتصلح بسرعه . المهم ، اللي صار أنه أنا ما كنت موجودة في البيت وقت ما جو ياخدوها ، بس حق السطحه اتصل عليه ، و يالله أنا جي اخد السياره دحين جهزيها ، قلبي وجعني على سيارتي ، شلت أغراضي منها و كنت خارجه ، فما شفت كيف اخدوها . و أنا راجعه شفتهم خارجين من باب السكن و حاطينها على السطحة قلبي وجعني عليها ، بس يالله خيره ان شاء الله تتصلح و ترجع .
Post a Comment
Read more

اليوم الأربعاء

يااااااااي استلمت سيارتي أمس . أمس اتصلوا الشركة و قالوا خلصت السياره ، المهم رحت مع زوجي و السواق لمخرج 18 ، مكان مرعب أول مره أشوفه ، هناقر و مافي شي جنبه ، خرجت من الدوام و رحت ، و المكان الله لا يوريكم ، أوكي هو واضح أنه الشركة الأم لها اشتراطات في شكل المكان ، و هو واضح أنه كان كويس أول ما فتح على الأقل بس أعتقد عشان المكان كله عمال معدوم . و بعدين كاتبين الجدول في سبورة ليش ما يحطوها في سيستم و يسير العميل يشوفها الكترونيا ، يقهروا.   أنا اكتشفت أنه نفسيتي كانت معدومة لأنه السارة ما كانت موجودة ، ما أعرف بس أحس أنها رجولي جزء مني ، مع أنه ماسارلي مدة طويلة بأسوق بس احس ما سرت أقدر استغني عنها . 
Post a Comment
Read more

اليوم الثلاثاء

اليوم الثلاثاء 9 جولاي ،ايش صار اليوم ؟ اممم الحمدلله الشوارع هادي الايام نوعا ما فاضيه ، أتوقع الناس سحبتها اجازة من الان لاجازة الحج ، عشان كدا نوعا ما الشوارع بدأت تفضى . في شي لاحظته لما أجي أعطي اشارة أني أبغى أروح يمين و لا شمال ، دايما اللي ورايا يقرر في نفس اللحظة يتجاوزني و يقرر ياخد المكان اللي أبغى أروحله ما أدري هي نداله هي لعانه هي أيش بالزبط ما أدري ، المهم خمسين في الميه لما أقرر أخد المسار اليمين و لا اليسار يجياللي ورايا يقرر ياخده ، خمسه و عشرين في المية اللي ورايا يسرع، و خمسه و عشرين ف يالميه تنجح محاولة أني أخد المسار اللي أبغاه . اليوم مرت عليه حاله جديده صراحه ، قررت أخد المسار و فجأة و أنا بانحرف بالسياره يجي واحد من المسار التاني اللي في الجهه التانيه يقرر ياخده كويس أني ما خبطت فيه و هديت عشان حضرته يعدي ، يعني ما أفهم سوء التقدير اللي ياخدوه بعض الناس اللي تسوق يعني اصبر دقيقه و بعدين تعل ورايا و لا هي الشغله عناد مو فاهمه . الشي التاني الناس البطيئين ، استغفرالله بس ، الناس اللي تمشي سبعين في شارع سرعته 90 و تعطل أمة لا اله الا الله ا...
Post a Comment
Read more