ليش هدا البلوق ؟

ليش قررت أبدأ هدا البلوق ، لأنه ببساطة اللي بأمر بيه في الشارع كل يوم و أنا في طريقي للدوام على الأقل لا يعقل ، أحس كل يوم لا زم أكتب في مكان عشان أفرغ شحنة الشر اللي تتكون في دماغي في النص ساعة زمان اللي أسوق فيها سيارتي من البيت للدوام . حأبدأ من اليوم و يمكن بعد كدا أرجع لورا شويه في حكاياتي ليش قررت أسوق و أنا اللي ما كنت أبغى ، و تجربتي في مدرسة السواقة ، كيف اشتريت السيارة ، كيف كانت السواقة في رمضان ، و أخيرا و ليس اخرا الحادث و الفيلم اللي معاه.

اليوم هو الرابع من جولاي ، رحلتي من البيت للدوام كانت جيدة نوعا ما ، كنت حأروح الجيم في الصباح بس فضلت أني أنام شوية لأنه لسه ورايا مشوار التأمين ، المهم خرجت 8 الا ربع من البيت و كانت الشوارع هادية نسبيا بحكم أنه اليوم خميس ، كانت السواقة ماشية تمام و فل الفل ، لغاية ما وصلت أول التخصصي الجسر اللي اكرهه ، الجسر اللي ينزل على الدائري الشمالي ، الجسر اللي يبدأوا الناس يتصرفوا فيه زي المجانين ، فجأة واحد من يميني و واحد من شمالي في نفس الوقت كانوا يبغوا يتجاوزوني ، و لولا ستر الله لخبطوا في بعض و أنا من وراهم ، سحبت فرامل ، و اللي ورايا واضح كان مسرع سحب فرامل بأقوى ما عند لاني سمعت صوت تفحيط و أداني ضربة بوري محترمة ، طيب يا ابن الناس انا ايشلي شغل اذا كانوا في قدامي اتنين حيوانات حيخبطوا في بعض اخبط فيهم أنا كمان ؟

المهم وصلت الدوام بسلامة الله و حفظه ،وقفت السياره في المواقف ، و نزلت ، غالبا لما أبعد من السيارة تطلع صوت أنها انقفلت ، لاحظت ما طلع الصوت ، قعد أدور على مفتاحي في الشنطة في هذه الاثناء ، مر واحد قالي سلام عليكم ، قلتله وعليكم السلام ، قالي لمباتك شغاله ، بغيت أقله عارفة أنا بأدور على مفتاحي عشان أقفل السيارة ، أحس أنهم يشوفوا أي بنت عشان يبينوا أنهم بطوليين و يساعدوا البنت الغشيمة .

 كلمت السواق يجي ياخدني عشان أروح أعمل مطالبة التأمين من الفرع ، و هو شي غبي ما أعرف ليش ما نقدر نعبي الفورم أونلاين و نحمل المستندات المطلوبة و نخلص ؟

جا السواق أخدني و رحت لفرع المطالبات ، اللي حصل أنه أتوقع السيكورتي شافني بنت و قالي حادث ؟ قلتله ايوه ، قال : أجل أطلعي فوق ، طلعت فوق مافي أحد مكاتب مو مكان مطالبات ، غر ف اجتماعات ، غرفة المدير ، و فعليا مافي و لا مخلوق ، فجأة طلعلي واحد من تحت الأرض و قالي تبغي حاجه قلتله ايوه عندي كليم أبغى أعمله ، قال أوكي تعالي ، رحت لمكتبه و أعطيته الأوراق ، قعد يطالع في الورقو قالي سيارتك ايش وكيلها ، قلتله (. . .  .) ، قام رفع السماعة و اتصل على زميله هي السيارة الفلانيه ايش وكيلها ، خييييييير ما عجبك جوابي؟؟

المهم اعطاني فورم أعبيه ، و شوية قالي ترا التقرير ما وصل من نجم ، قلتله نعم ؟ أنا أمس مكلمة مركز الاتصال و قالوا بما أنه مرت 48 ساعه معناته في عطل في السيستم أنه الرساله ما وصلت ، روحي الفرع و عبي الفورم ، قلتله أنا مستأذنه من دوامي و خارجه أن اما أقدرأخرج كل يوم ، قال اوكي خلاص أنا راح أعملك أوراقك بس يوصلنا التقرير ، عبيت الاوراق و طلعت ، و انتهت أول حلقة من مسلسل المطالبة و مسلسل أنا و السواقة.

تشاو