ثاني بوست

اليوم الاحد 7 جولاي ، هدا تاني بوست ليه ، اليوم الطريق كان نوعا ما فاضي ، السواقه كانت نوعا ما سموذ ، و كالعادة لازم يكون في لكن ، مستحيل تكون السواقه سموذ من البداية للنهاية .

أول شي اشارات الدوار اللي جنب مستشفى المملكة ، انا اعترف أنه هادي الاشارات سهلت السواقه في دا الدوار ، و أعتقد لو أنه الدوار كان زي السابق اتوقع كان مستحيل أسوق أو أطب في المكان دا لأنه كان مرعب قبل ما يحطوا الاشارات .

نجي للجزء التاني الاشارات رهيبه و نظمت الموضوع تماما ، و لكن اتوقع لما جو صممو الشارع ما حسبوا عدد السيارا تالمهول اللي بتمر من دي المنطقة ، أو أنه عدد السيارات اتضاعف فجأة ، كمية الزحمة هناك لا تطاق ، و خصوصا السيارات اللي تجي تسقط من جنب ، اتوقع لو عسكري وقف جنب كل اشاراه و خالف الناس اللي بتسقط ، يمكن الناس تتوب و الموضوع يتنظم أكتر مدري؟ هدا غير اللي ياخدوا لفه في الدوار و فجأة يكتشفوا أنهم وقفوا في اللفة الغلط و يعكسوا المسارو لا يرتكبوا أي تهور في وسط الدوار ، و هو بصراحة الدوار دا زي المتاهه ، لو ما عرفت بالزبط فين توقف حتلاقي نفسك في المكان الغلط .

نرجع لموضوعنا ،كل مره أوقف في دي الاشارات أحس نفسي في سباق مع السرعه وضبط النفس و الزمن ، أول شي هي تلاته اشارات ورا بعض ، و لازم تسرع بسرعه محدد عشان يمديك تلحقهم كلهم في نفس الوقت ، و لو جا واحد عله قدامك و يمشي بسرعة السلحفاة فاللــــه يعينك ، وأو واحد قرر يسقط عليك فجأة برضه اللــــه يعينك , و ضبط النفس لانه زي ما قلت فجأة واحد يقرر يسقط عليك لأنه الذكاء اللي هو فيه أعطاه قرار أنه مساري أسرع من مساره . 

الشي التاني اللي حصل اليوم نفس اللي سار المره السابقه واحد بيتجاوزني من اليمين و وواحد بيتجاوزني من اليسار في نفس الوقت و ما أعرف ايش حصل بس أعتقد لانه الشوارع اليوم أفضى من أمس فكان تلافيهم لموضوع الاصطدام أحسن من اللي سار يوم الخميس.

هذا كان تقرير سواقة اليوم ، سي يو تومرو ان شاء الله