اليوم الثالث

اليوم مشواري الصبح كان بدري شويه ، كان من الساعه 7 الا ربع ، أنا عادة كل يوم أمشي على الساعه 8 الا ربع عشان أوصل الدوام 8 و شي ، بس اليوم كان لازم أخرج بدري عشان الجيم ، ما أحب أروح الجيم بعد الدوام فأفضل وقت بالنسبة ليه من 7 الى 8 قبل الدوام .

المهم قلت بما أنه مشواري بدري قبل ما يصحوا المداومين في الصيف ، أكيد الشوارع فاضيه و جميله و رايقة ، الحقيقة نعم هي كانت فاضيه و لكن لا بد من لكن ، في نص شارع الثمامه عند اليوتيرن اتوقع كان في واحد نايم بياخد اليوتيرن و طلع فوق الرصيف ، كان فيه سطحه جيه تسحبه ، و السطحه حرفيا طالعه فوق الرصيف و في ناس واقفين في نص شارع الثمامه بيأشروا للسيارات عشان توخر شويه من جنب اليوتيرن ، يعني و لا كأنه شي ، طيب لو واحد مسرع و ما انتبهلهم ممكن يعس واحد فيهم  ،كويس أنه الشارع فاضي و مافي زحمه .

 

 لما قربت من الجيم في شارع طويل عريض طلعلي ونيت واضح أنه اللي سايقه عامل ، خرج الونيت من الشارع الفرعي و حرفيا واقف في نص الشارع ينتظرني أعدي ، طبعا عملت حركتي الشهيره بأني شنفت أذانه بصوت الزمور ، و لما عديت من عنده ( في الحقيقة اضطريت انحرف شويه عشان ما اصدم فيه ) ، لقيته عكس الشارع و كمل مشي كأنه ما سار شي ، ففهمت ليش كان واقف في نص الشارع لأنه كان مخطط يعكس الشارع ، لفيت للشارع اللي جنبه بيحفروا أم الشارع من الطرف في مكان غلط ، و برضو مافي أي تنبيه غير غبار بيطير و عامل بيأشر بيده ، لا و ورا الفيلم دا في مطب ، الحمدلله أني حافظته و بعده في لفة يمين ، يعني ما أدري وقت الزحمه ايش ممكن يسير دا الشارع .

خلصت من الجيم و أبغى أروح الدوام ، طبعا لازم استخدم الاشاره الاكثر توتيرا في العالم ، اشارة مستشفى المملكه ، و قفت فيها وفتحت ، الاشاره اللي بعدها ، اللي ماشي قدامي قطعها و لا كأنه في أي مشكله في الحياه .

قربت من الدوام أول ما دخلت التخصصي زحمه غير طبيعيه ، قلت اللهم اجعه خير أكيد حادث ، لما قربت من المكان لقيت سيارتين شرطة ، و سياره مهبطة مره ما أدري هو حادث و لا كان بيفحط و لا ايش بيهبب المهم كان مره زحمه في وقت مره غلط .

الله يعين على السواقه